ທ່ານຮູ້ບໍ່ວ່າ ປະຊາກອນລາວ ເກືອບນຶ່ງໃນສາມທີ່ຍັງສູບຢາ ຖືວ່າຫຼາຍເປັນອັນດັບທີ 2 ຂອງພູມີພາກອາຊຽນ

ທ່ານຮູບໍ່ວ່າ ປະຊາກອນລາວ ເກືອບນຶ່ງໃນສາມທີ່ຍັງສູບຢາ ຖືວ່າຫຼາຍເປັນອັນດັບທີ 2 ຂອງພູມີພາກອາຊຽນ

ອັດຕາການສູບຢາຂອງປະຊາກອນລາວມີເຖິງ 27,9% ຫຼື ປະມານ 800.000 ກວ່າຄົນ ຂອງພົນລະເມືອງທີ່ມີອາຍຸແຕ່ 15 ປີຂຶ້ນໄປ ເຊິ່ງຖ້າຄິດໄລ່ອັດຕາສ່ວນຂອງປະຊາກອນເຫັນວ່າມີສະຖິຕິຫຼາຍເປັນອັນດັບ 2 ຂອງພູມີພາກອາຊຽນ ແລະ ໃນແຕ່ລະປີ ສປປ ລາວ ກໍມີຜູ້ເສຍຊີວິດຍ້ອນພະຍາດທີ່ເກີດຈາກຢາສູບເກືອບ 5 ພັນຄົນ.

ໂຕເລກດັ່ງກ່າວໄດ້ຮັບການເປີດເຜີຍໃນພິທີຍ່າງເພື່ອສຸຂະພາບ ເພື່ອສະເຫຼີມສະຫຼອງວັນງົດສູບຢາໂລກ  (ວັນທີ 31 ພຶດສະພາ) ວາລະດັ່ງກ່າວຈັດຂຶ້ນໃນຕອນເຊົ້າຂອງວັນທີ 27 ພຶດສະພາ 2017 ທີ່ສວນສາທາລະນະປະຕູໄຊ ໂດຍການເຂົ້າຮ່ວມຂອງ ທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ ທ່ານ ຮສ.ດຣ ບຸນກອງ ສີຫາວົງ ລັດຖະມົນຕີກະຊວງສາທາລະນະສຸກ ທ່ານ ດາແປງ ລູ ຮັກສາການຜູ້ຕາງໜ້າອົງການອານາໄມໂລກ ປະຈຳ ສປປ ລາວ ມີຕາງໜ້າສະມາພັນຄວບຄຸມຢາສູບອາຊຽນ ພ້ອມດ້ວຍບັນດາລັດຖະມົນຕີ ຮອງລັດຖະມົນຕີ ຮອງເຈົ້າຄອງນະຄອນຫຼວງວຽງຈັນ  ແຂກຖືກເຊີນ ພະນັກງານ ວິຊາການທີ່ກ່ຽວຂ້ອງ ແລະ ນ້ອງໆນັກຮຽນ-ນັກສຶກສາ ພ້ອມທັງມວນຊົນຊາວນະຄອນຫຼວງວຽງຈັນເຂົ້າຮ່ວມຢ່າງຫຼວງຫຼາຍ.

ທ່ານຮອງນາຍົກລັດຖະມົນຕີ ໄດ້ໃຫ້ກຽດຂຶ້ນກ່າວໄຂພິທີຍ່າງເພື່ອສຸຂະພາບຢ່າງເປັນທາງການ​ວ່າ ປີນີ້ ຄົບຮອບ 29 ປີ ​ຂອງວັນງົດສູບຢາໂລກ ແລະ ຄົບຮອບ 8 ປີຂອງວັນງົດຢາສູບແຫ່ງຊາດ ເຊິ່ງໃນແຕ່ລະປີ ອົງການອານາໄມໂລກ ຮ່ວມກັບປະເທດພາຄີສົນທິສັນຍາສາກົນ ວ່າດ້ວຍການຄວບຄຸມຢາສູບ ເພື່ອວາງຄໍາຂວັນອອກຕາມສະພາບການຂອງໂລກ ແລະ ສໍາລັບປີນີ້ ຄໍາຂວັນຂອງວັນງົດຢາສູບໂລກກໍແມ່ນ “ຢາສູບເປັນໄພຂົ່ມຂູ່ຕໍ່ການພັດທະນາ” ໂດຍຊີ້ໃຫ້ເຫັນອັນຕະລາຍຂອງການສູບຢາ ແລະ ການສູດດົມເອົາຄວັນຢາສູບ ການພັດທະນາເສດຖະກິດ-ສັງຄົມ ແລະ ສຸຂະພາບຂອງມວນມະນຸດ ທັງເປັນການປຸກລະດົມໃຫ້ທົ່ວໂລກໄດ້ຮັບຮູ້ວ່າ ການຄວບຄຸມຢາສູບເປັນພາລະ ແລະ ໜ້າທີ່ຂອງໜົດທຸກຄົນໃນທົ່ວສັງຄົມ ທີ່ຕ້ອງເອົາໃຈໃສ່ຮ່ວມກັນ ທັງນີ້ ກໍຍ້ອນວ່າການສູດດົມຄວັນຢາສູບເປັນອັນຕະລາຍຕໍ່ສຸຂະພາບທັງຕໍ່ຜູ້ສູບເອງ ແລະ ຄົນອອ້ມຂ້າງ.

ຍ້ອນຄວາມຖືເບົາຕໍ່ໄພອັນຕະລາຍຂອງຢາສູບ ແລະ ຄວາມຮັບຮູ້ກ່ຽວກັບໄພຮ້າຍຂອງຢາສູບທີ່ມີລັກສະນະຜິວເຜີນ ເບົາບາງ ດັ່ງນັ້ນ ຈິ່ງເຫັນວ່າຫຼາຍໆຄົນຍັງຄົງສູບຢາຕໍ່ໄປເລື້ອຍໆ ແລະ ກາຍເປັນບ່ອນອີງ ຫຼື ແບບຢ່າງໃຫ້ຊາວໜຸ່ມ ແລະ ເຍົາວະຊົນ ເຊິ່ງໃນຄວາມຈິງແລ້ວ ຢາສູບແມ່ນແຝງມາດ້ວຍໄພຮ້າຍທຳລາຍຊີວິດ ອັນໄດ້ເຮັດໃຫ້ທົ່ວໂລກມີຄົນຕາຍຍ້ອນພະຍາດທີ່ເກີດຈາກຢາສູບເຖິງ 6 ລ້ານຄົນ​ໃນ​ແຕ່​ລະ​ປີ  ແລະ ຈະ​ເພີ່ມ​ຂຶ້ນເຖິງ 10 ລ້ານ​ຄົນ​ຕໍ່​ປີ ພາຍ​ໃນ​ປີ 2030 ຂະນະທີ່ ສປປ ລາວ ທີ່ຕາຍຍ້ອນພະຍາດເຊິ່ງເກີດຈາກຢາສູບ 4.807 ຄົນ.

ເຖິງແມ່ນວ່າກົດໝາຍວ່າດ້ວຍການຄວບຄຸມຢາສູບ ໄດ້ປະກາດໃຊ້ຢ່າງເປັນທາງການມາແລ້ວ 8 ປີກໍຕາມ ແຕ່ການຈັດຕັ້ງປະຕິບັດ ແລະ ການບັງຄັບໃຊ້ກົດໝາຍດັ່ງກ່າວກໍຍັງປະຕິບັດບໍ່ທັນໄດ້ດີ ເຊິ່ງເຫັນວ່າຍັງປະຕິບັດໄດ້ແຕ່ບາງພື້ນທີ່ ແລະ ບາງໂອກາດເທົ່ານັ້ນ ທັງນີ້ ທາງຮອງນາຍົກລັດຖະມົນຕີ ໄດ້ເຊີນຊວນຜູ້ທີ່ສູບຢາພະຍາຍາມອອກຢາສູບໃຫ້ໄດ້ ແລະ ຜູ້ບໍ່ເຄີຍສູບຢາ ໂດຍສະເພາະບັນດາລູກຫຼານທີ່ຈະເປັນໜໍ່ແໜງຂອງຊາດໃນອະນາຄົດ ຈົ່ງຫຼີກເວັ້ນຈາກສິ່ງເສບຕິດ ແລະ ຫັນມາອອກກໍາລັງກາຍ ເພື່ອເຮັດໃຫ້ສຸຂະພາບແຂງແຮງ ທັງປະຢັດໄດ້ເສດຖະກິດຂອງຕົນ ຄອບຄົວ ສັງຄົມ ແລະ ປະເທດຊາດ ຍ້ອນວ່າຢາສູບເຮັດໃຫ້ເກີດພະຍາດຫຼາຍຢ່າງ ແລະ ຖ້າເຈັບປ່ວຍດ້ວຍພະຍາດທີ່ເກີດມາຈາກຢາສູບ ກໍຈະເພີ່ມຄ່າໃຊ້ຈ່າຍໃນການປິ່ນປົວ ແລະ ຮັກສາສຸຂະພາບໃຫ້ແກ່ຄອບຄົວເຖິງ 77% ຂອງຄ່າໃຊ້ຈ່າຍທັງໝົດທີ່ຍັງບໍ່ຮວມເຖິງການຊື້ຢາສູບແຕ່ລະວັນ ເຊິ່ງໃນປັດຈຸບັນ ຄົນລາວສູບຢາສະເຫຼ່ຍແລ້ວປະມານ 13,3 ກອກຕໍ່ມື້.

By: Buysoldonline.com

Soure:www.vtetoday.la

 

Posted in ຂ່າວ, ສະລະໜ້າຮູ້ທົ່ວໄປ and tagged , , .