ເຈົ້າໜ້າທີ່ສະຫຼຸບ ເຫດລົດໂດຍສານ ວຽງຈັນ-ຮ່າໂນ່ຍ ລະເບີດໃນວັນທີ 28 ພຶດສະພາ ຜ່ານມາ

Buysoldonline.com

ເຫດ​ໄຟ​ໄໝ້ລົດ​​ໂດຍສານ ວຽງ​ຈັນ-ຮ່າ​ໂນ່ຍ ຢ່າງ​ຮຸນ​ແຮງ ​ໃນ​ແລງ​ວັນ​ທີ 28 ພຶດສະພາ​ນີ້, ຢູ່​ບ້ານ​ນາ​ລ້ອມ, ​ເມືອງ​ໄຊ​ທານີ ນະຄອນຫລວງ​ວຽງ​ຈັນ ​ໄດ້​ເຮັດ​ໃຫ້ລົດ​ໂດຍສານດັ່ງກ່າວ ແລະ ​ເຮືອນ​ໃກ້​ຄຽງ​ອີກ 10 ຫລັງ​ໄດ້​ຮັບ​ຄວາມ​ເສຍ​ຫາຍ ສົ່ງ​ຜົນ​ໃຫ້​ມີ​ຜູ້​ເສຍ​ຊີວິດ 1 ຄົນ ​ແລະ ບາດ​ເຈັບ 3 ຄົນ.

ທ່ານ ພັນຕີ ​ເກດສະໜາ ພິຈິດ ຮອງ​ຫົວໜ້າ​ພະ​ແນ​ກຕຳຫລວດ​ສືບສວນ-ສອບ​ສວນ ຄະດີ​ອາຍາ ນະຄອນຫລວງ​ວຽງ​ຈັນ ​ໃຫ້​ຮູ້​ວ່າ: ​ກ່ອນ​ເກີດ​ເຫດ​​ເວລາປະມານ 18:00 ​ໂມງ​ຂອງ​ວັນ​ທີ 28 ພຶດສະພາ​ນີ້, ລົດ​ໂດຍສານ​ໝາຍ​ເລກ​ທະບຽນ ບຂ 5762 ກຳ​ແພງ​ນະຄອນ, ​ໄດ້​ນຳສົ່ງ​ຜູ້​ໂດຍສານຢູ່​ຄິວ​ລົດ​ສາຍ​ໃຕ້​ຕາມ​ປົກກະຕິ ​​ແລ້ວ​ກໍ​ກັບ​ເຂົ້າ​ເຮືອນ, ຢູ່​ບ້ານ​ນາ​ລ້ອມ, ​ເມືອງ​ໄຊ​ທານີ, ນະຄອນຫລວງ​ວຽງ​ຈັນ, ຈາກ​ນັ້ນ ທ້າວ ​ໂງ ສີ ຢາງ (Ngo Sy Giang) ອາຍຸ 28 ປີ (ຄົນ​ຂັບ​ລົດ​ດັ່ງກ່າວ), ນຳ​ເອົາ​ບັ້ງ​ອົກ​ຊີມາ​ຈອດ​ຕຽງ​ນອນພາຍ​ໃນ​ລົດ ​ເພື່ອ​ສ້ອມ​ແປງ​ຈຸດ​ເປ່​ເພ​, ພ້ອມ​ທັງ​ມີ​ຍາດ​ພີ່ນ້ອງ​ອີກ 3 ຄົນ​ມາ​ອະນາ​ໄມ​ພາຍ​ໃນ​ລົດ​ຕາມ​ປົກກະຕິ, ​ເມື່ອ​ເວລາ​ຜ່ານ​ໄປ​ບໍ່​ດົນ ​ໄດ້​ເຮັດ​ໃຫ້​ມີ​ປະກາຍ​ໄຟ​ເກີດ​ຂຶ້ນ​ຢູ່​ຈຸດ​ສ້ອມ​ແປງ​ດັ່ງກ່າວ​ແລ້ວ​ແປວ​ໄຟ​ລາມ​ໄປຫາ​ລູກ​ກະ​ໂພ​ກຂະໜາດ​ໃຫຍ່ຈຳນວນ​ໜຶ່ງ​ຢູ່​ພາຍ​ໃນ​ລົດ​ເກີດ​ລະ​ເບີດ​ຂຶ້ນ​ຢ່າງ​ຮຸນ​ແຮງ ​ແລະ ຕໍ່​ເນື່ອງ​ກັນ, ສົ່ງ​ຜົນ​ໃຫ້​ທ້າວ ​ໂງ ສີ​ຢາງ ​ເສຍ​ຊີວິດ​ຄາ​ທີ່ ​ແລະ ອີກ 3 ຄົນ​ທີ່​ອະນາ​ໄມ​ຢູ່​ນັ້ນໄດ້​ຮັບ​ບາດ​ເຈັບ​ສົມຄວນ, ນອກ​ນີ້ ສະ​ເກັດ​ຂອງ​ລູກກະ​ໂພ​ກ ​ແລະ ​ເສດ​ເຫລັກ​ຂອງ​ລົດ​ໂດຍສານ ຟົ້ງ​ກະຈາຍ​ອອກ​ໄປ​ກະທົບ​ໃສ່​ເຮືອນ​ທີ່ຢູ່​ໄກ້​ຄຽງ ຈຳນວນ 10 ກວ່າ​ຫລັງ​ໄດ້​ຮັບ​ຄວາມ​ເສຍ​ຫາຍ.
ເຈົ້າ​ໜ້າ​ທີ່ ​ໃຫ້​ຮູ້​ວ່າ: ​ເຫດການ​ດັ່ງກ່າວ ​ເກີດ​ຂຶ້ນ​ຍ້ອນ​ຄວາມ​ປະໝາດ, ​ເລີ້ນ​ເລີ້​ຂອງ​ຜູ້​ກໍ່​ເຫດ, ຊຶ່ງ​ຮູ້​ຢູ່​​ວ່າ​ພາຍ​ໃນ​ລົດ​ມີ​ວັດຖຸ​ໄວ​ໄຟ ​ແຕ່​ຍັງ​ບໍ່​ມີ​ສະຕິ ອັນ​ເປັນ​ຕົ້ນ​ເຫດ​ກໍ​ໃຫ້​ເກີດ​ຄວາມ​ເສຍ​ຫາຍ​ດັ່ງກ່າວ.

ທີ່ມາ: ໜັງສືພິມລາວພັດທະນາ

Posted in ການສັນຈອນ, ຂ່າວ, ທົ່ວໄປ and tagged .