ມຊ ຈັດສໍາມະນາ ອາຊຽນ 2017 ສ້າງຄວາມເຂັ້ມແຂງວຽກງານວິສາຫະກິດຂະໜາດນ້ອຍ-ກາງ

ມະຫາວິທະຍາໄລແຫ່ງຊາດ(ມຊ)ຈັດກອງປະຊຸມສໍາມະນາ ອາຊຽນ 2017 ໂຄງການພັດທະນາຄວາມເຂັ້ມແຂງຂອງວິສາຫະກິດຂະໜາດນ້ອຍແລະກາງໃນອາຊຽນໂດຍຜ່ານການສົ່ງເສີມການສ້າງເຄື່ອຂ່າຍການສຶກສາດ້ານການປະກອບກິດຈະການ

ໃນວັນທີ 25 ພຶດສະພາ ຜ່ານມາ ທີ່ໂຮງແຮມ ຄຣາວ ພລາຊ່າ ວຽງຈັນ ນະຄອນຫຼວງວຽງຈັນ ໂດຍໃຫ້ກຽດເຂົ້າຮ່ວມຂອງ

ທ່ານ ສຈ.ປອ ສົມສີ ຍໍພັນໄຊ ອະທິການບໍດີ ມະຫາວິທະຍາໄລແຫ່ງຊາດ, ທ່ານ ຮສ.ປອ ໂພສີ ຈັນມິ່ງ  ຜູ້ປະສານງານໂຄງການ

ຝ່າຍລາວ ທັງເປັນຄູເຝິກ, ທ່ານ ໂອເຮະ ທາເກລຸປະທານໂຄງການພັດທະນາຄວາມເຂັ້ມແຂງຂອງວິສາຫະກິດຂະໜາດນ້ອຍແລະຂະໜາດກາງໃນອາຊຽນ ພ້ອມດ້ວຍຜູ້ຕາງໜ້າຈາກ 10 ປະເທດອາຊຽນ, ມີພາກສ່ວນຕົວແທນພາກລັດ, ສະຖາບັນການສຶກສາ ແລະ ພາກທຸລະກິດເຂົ້າຮ່ວມ 64 ຄົນ.

ໂອກາດດັ່ງກ່າວ, ທ່ານ ສຈ.ປອ ສົມສີ ຍໍພັນໄຊ ໄດ້ກ່າວວ່າ: ການຈັດກອງປະຊຸມສໍາມະນາຄັ້ງນີ້, ກໍ່ເພື່ອ​ເປັນ​ການລາຍງານຄວາມຄືບໜ້າຂອງໂຄງການພັດທະນາຄວາມເຂັ້ມແຂງຂອງວິສາຫະກິດຂະໜາດນ້ອຍ ແລະ ຂະໜາດກາງໃນອາຊຽນ ໂດຍຜ່ານການສົ່ງເສີມການສ້າງເຄື່ອຂ່າຍການສຶກສາດ້ານການປະກອບກິດຈະການ ແລະ ສົ່ງເສີມເຄື່ອຂ່າຍການສິດສອນສູນບົ່ມເພາະທຸລະກິດໃນບັນດາປະເທດສະມາຊິກອາຊຽນ ທີ່ໄດ້ຮັບການສະໜັບ ສະໜູນ ໂດຍກອງທຶນເຊື່ອມສານ  ລະຫວ່າງ ຍີ່ປຸ່ນ-ອາຊຽນ  ທີ່ໄດ້ຮັບການເຫັນດີຈາກອົງການ ວິສາຫະກິດຂະໜາດນ້ອຍ ແລະ ກາງ ໃນອາຊຽນ ແລະ ຍີ່ປຸ່ນ.

ນອກຈາກນັ້ນ, ​ໃນ​ພິທີຍັງໄດ້ຮັບຟັງການລາຍງານຜົນການຈັດຕັ້ງປະຕິບັດໂຄງການພັດທະນາຄວາມເຂັ້ມແຂງຂອງວິສາຫະກິດຂະໜາດນ້ອຍ ແລະ ຂະໜາດກາງໃນອາຊຽນ ໂດຍຜ່ານການສົ່ງເສີມການສ້າງເຄື່ອຂ່າຍການສຶກສາດ້ານການປະກອບກິດຈະການ ແລະ ປຶກສາຫາລືແຜນການຮ່ວມມື ແລະ ການສ້າງເຄື່ອຂ່າຍໃນອະນາຄົດແລະ ຮັບຟັງຜົນຂອງການນໍາໃຊ້ວິທີການເຝິກອົບຮົມວິສາຫະກິດຂະໜາດນ້ອຍ ແລະ ກາງໃນອາຊຽນ ໂດຍຜ່ານວິທີການຮຽນຮູ້ຈາກການໃຫ້ຄໍາປຶກສາ ໃນ 3 ໂຄງການ  ຄື: ເຝິກອົບຮົມຜູ້ບໍລິຫານສູນບົ່ມເພາະທຸລະກິດ, ໂຄງການພັດທະນາຍຸດທະສາດ ແລະ ການຮ່ວມມືທາງດ້ານທຸລະກິດ. ສໍາລັບກອງປະຊຸມສໍາມະນາດັ່ງກ່າວ ແມ່ນ​ໄດ້ດໍາເນີນ​ໄປເປັນເວລາ 2 ວັນ (25-26 ພຶດສະພາ) ຈຶ່ງ​ສຳ​ເລັດ.

 

 

Posted in ຂ່າວ and tagged .