ໄລຍະທີ່ເກີດພາຍຸລະດູຮ້ອນໃນຕົ້ນເດືອນນີ້ ໄດ້ເກີດມີຟ້າຜ່າສັດລ້ຽງຂອງປະຊາຊົນລົ້ມຕາຍເປັນຈໍານວນຫຼາຍ

ໄລຍະທີ່ເກີດພາຍຸລະດູຮ້ອນໃນຕົ້ນເດືອນນີ້ ໄດ້ເກີດມີຟ້າຜ່າສັດລ້ຽງຂອງປະຊາຊົນລົ້ມຕາຍເປັນຈໍານວນຫຼາຍ

ນັບເປັນເລື່ອງເສົ້າໃຈຕໍ່ການສູນເສຍຊັບສິນປະເພດສັດລ້ຽງ ອັນເນື່ອງມາຈາກໄພທຳມະຊາດ (ຟ້າຜ່າ) ເຊິ່ງມີຂ່າວມາວ່າ ເມື່ອວັນທີ 06 ພຶດສະພາ 2017 ຜ່ານມາ ໄດ້ເກີດເຫດຟ້າຜ່າຕົ້ນໄມ້ ເຮັດໃຫ້ງົວຂອງປະຊາຊົນທີ່ເຂົ້າໄປຫຼົບຝົນຢູ່ໃຕ້ກ້ອງຕົ້ນໄມ້ນັ້ນ ລົ້ມຕາຍລົງພ້ອມກັນ 7 ໂຕ ເຫດການດັ່ງກ່າວເກີດຂື້ນທີ່ບ້ານໂພນສະຫວ່າງ ເມືອງວິລະບູລີ ແຂວງສະຫວັນນະເຂດ ຕໍ່ມາອີກ 3 ວັນ ເຫດການແບບດຽວກັນກໍເກີດຂຶ້ນອີກທີ່ບ້ານນາຂາມ ເມືອງຄູນຄຳ ແຂວງຄຳມ່ວນ ຄືເມື່ອວັນທີ 09 ພຶດສະພາ 2017 ທີ່ຜ່ານມາ ກໍເກີດເຫດຟ້າຜ່າລົງກາງທົ່ງນາຖືກຄວາຍທີ່ພວມໂຮມໂຕກັນກິນຫຍ້າຢູ່ທົ່ງນາ ລົ້ມຕາຍລົງພ້ອມກັນເຖິງ 26 ໂຕ.

ທາງຜູ້ສັນທັດກໍລະນີໄດ້ໃຫ້ຄໍາແນະນໍາວ່າ ທັງສອງເຫດການຖືເປັນຄວາມສູນເສຍທີ່ມີມູນຄ່າຫຼວງຫຼາຍ ທັງນີ້ ກໍຖືເປັນອຸທາຫອນເຕືອນໃຈມະນຸດເຮົາຈົ່ງຢ່າປະໝາດຕໍ່ເຫດການທາງທຳມະຊາດເຊັ່ນ ຟ້າມາບເຫຼື້ອມ ຟ້າຮ້ອງ ພາຍຸຝົນລົມແຮງ ເຊິ່ງມີຫຼາຍຄົນທີ່ມັກແລ່ນເຂົ້າໄປຊົ້ນຢູ່ກ້ອງຕົ້ນໄມ້ໃຫຍ່ ຫຼື ອອກໄປເກັບປາຢູ່ກາງທົ່ງນາ ຫຼື ເດີນທາງຢູ່ກາງແຈ້ງ ກາງເດີ່ນກວ້າງໃນຍາມຝົນຕົກ ທີ່ຖືເປັນຈຸດດຶງດູດສາຍຟ້າ ດັ່ງນັ້ນ ຈິ່ງຄວນຫຼົບຫຼີກເຂົ້າໄປໃນທີ່ຢູ່ອາໄສອັນປອດໄພ ເຊິ່ງບໍ່ໄດ້ຕັ້ງຢູ່ໂດດດ່ຽວ ແລະ ຄວນມອດສັນຍານໂທລະສັບ ມອດໂທລະພາບ ວິທະຍຸ ແລະ ປົດເຄື່ອງປະດັບຕ່າງໆອອກຈາກຮ່າງກາຍ ແລະ ຫຼີກເວັ້ນ ຫຼື ຢູ່ໃກ້ເຄື່ອງໂລຫະປະເພດເຫຼັກ ແລະ ອື່ນໆ ທັງນີ້ ກໍເພື່ອຄວາມປອດໄພໃນຊີວິດນັ້ນເອງ.

Surce:http://www.vtetoday.la/ໄລຍະທີ່ເກີດພາຍຸລະດູຮ້ອ/

Posted in ຂ່າວ, ທົ່ວໄປ, ພັກ-ລັດ and tagged .