ເປີດການນຳໃຊ້ຂົວອູ່ຖາວອນ ບ້ານມົກຈົກ,ກຸ່ມພູຫລວງ, ເມືອງນາແລ ແຂວງຫລວງນຳທາ

ໂຄງການ​ກໍ່ສ້າງ​ຂົວອູ່​ຖາວອນ ຢູ່​ບ້ານ ມົກຈົກ ກຸ່ມ​ພູຫຼວງ, ​ເມືອງ ນາ​ແລ, ​ແຂວງ ຫຼວງນ້ຳທາ ​ເປັນ​ໂຄງການໜຶ່ງທີ່​ນອນ​ໃນ​ແຜນ​ງານ​ຂອງ​ກອງ​ທຶນຫຼຸດຜ່ອນ​ຄວາມທຸກ​ຍາກ (ທລຍ)  ກ່ຽວກັບ​ການ​ແກ້​ໄຂ​ຄວາມທຸກ​ຍາກ​ໃຫ້​ແກ່​ປະຊາ ຊົນ​ບັນດາ​ເຜົ່າ ທີ່ຢູ່​ໃນ​ເຂດ​ຊົນນະບົດ​ຫ່າງ​ໄກ​ສອກຫຼີກ. ​ໂຄງການ​ດັ່ງກ່າວ​​ເລີ່​ມກໍ່ສ້າງ​ປີ 2013 ຮອດ​ຕົ້ນປີ 2017 ນີ້ ​ໄດ້​ສຳ​ເລັດ​ການກໍ່ສ້າງ ​ໃນ​ມູນ​ຄ່າ​ 675 ລ້ານ​ກີບ ​ໂດຍ​ໃຊ້​ທຶນ​ສົມທົບ​ຈາກ​ລັດຖະບານ​ລາວ; ທະນາຄານ​ໂລກ; ອົງການ​ເພື່ອ​ການ​ພັດທະນາ ​ແລະການ​ຮ່ວມ​ມື​ປະ​ເທດ​ສະ​ວິດ​ເຊີ​ແລນ ​ແລະ ​ອົງການ​ເຮ​ວວິດ​ຕັນ ​ເຊິ່ງ​ແມ່ນ​ບໍລິສັດ ​ແກ້ວ​ມະນີກໍ່ສ້າງ​ຂົວ​ທາງ​ເຄຫາ ​ແລະ ຊົນລະປະທານ ​ເປັນ​ຜູ້​ຮັບ​ເໝົາກໍ່ສ້າງ ດ້ານ​​ເຕັກນິກ​ໄດ້​ອອກ​ແບບ​ເປັນ​ຂົວ​ອູ່​ຖາວອນ ​ໂດຍ​ນຳ​ໃຊ້​ບົດຮຽນຈາກ​ປະ​ເທດ​ເນ​ປານ ສາຍ​ກາບ​ເຄືອ​ບດ້ວຍ​ສານ​ກາ​ວາ​ໄນ,​ ອາ​ຍຸ​ການ​ນຳ​ໃຊ້​ 50 ປີ, ມີ​ຄວາມ​ຍາວ 118 ​ແມັດ,​ ກວ້າງ 1,2 ​ແມັດ ຂົວ​ດັ່ງກ່າວ​ສາມາດ​ຮັບ​ນ້ຳໜັກ​ໄດ້​ທັງໝົດ 30 ກວ່າ​ໂຕນ (1 ​ແມັດ​ຮັບ​ນ້ຳໜັກ​ໄດ້ 300 ກິ​ໂລ ຫຼື ລົດ​ຄັນໜຶ່ງ​ບັນທຸກ​ເຄື່ອງ​ບໍ່​ເກີນ 300 ກິ​ໂລ). ປັດຈຸບັນ​ເຮັດ​ໃຫ້​ປະຊາຊົນ​ບ້ານ​ມົກຈົກ ​ແລະ ບ້ານ​ອ້ອມ​ຂ້າງ​ມີ​ຂົວຊົມ​ໃຊ້ ​ຊີວິດ​ການ​ເປັນ​ຢູ່​ສະດວກ​ສະບາຍ​ຂຶ້ນ​ໃນ​ການ​ໄປມາຫາສູ່​ກັນ, ​ແລກປ່ຽນຊື້-ຂາຍລະ ຫວ່າງ​ບ້ານ​ຕໍ່ບ້ານ ​ແລະ ບ້ານ​ຫາ​ຕົວ​ເມືອງ.

ໃນ​ວັນ​ທີ 4 ພຶດສາ​ພາ 2017 ​ໄດ້​ຈັດ​ພິທີ​ເປີດ​ນຳ​ໃຊ້​ຂົວ​ອູ່ (ຂົວ​ຂ້າມ​ນ້ຳທາ) ຂຶ້ນຢ່າງ​ເປັນ​ທາງ​ການ ຢູ່​ບ້ານ ມົກຈົກ ກຸ່ມ​ພູຫຼວງ, ​ເມືອງ ນາ​ແລ, ​ແຂວງ ຫຼວງນ້ຳທາ ​ໂດຍ​ການ​ເຂົ້າຮ່ວມ​ຂອງ​ທ່ານ ຄຳ​ບຸນ​ນັດ ​ໄຊ​ຍະ​ນົນ ຮອງ​ລັດຖະມົນຕີ​ກະ​ຊວງ​ກະສິກຳ ​ແລະ ປ່າ​ໄມ້; ທ່ານ ປະລິນຍາ​ເອກ ​ເພັງ​ພາ​ວັນ ດາວ​ພອນ​ຈະ​ເລີ​ນ ຮອງ​ເຈົ້າ​ແຂວງໆຫຼວງນ້ຳທາ; ພ້ອມ​ດ້ວຍ​ພາກສ່ວນ​ທີ່​ກ່ຽວຂ້ອງ​ຂັ້ນສູນ​ກາງ, ຂັ້ນທ້ອງ​ຖິ່ນ; ຜູ້ອຳນວຍ ການ​ບໍລິສັດ​ຮັບ​ເໝົາກໍ່ສ້າງ; ພະນັກງານ​ວິຊາ​ການ ​ແລະ ປະຊາຊົນ​ເຂົ້າຮ່ວມ​ຢ່າງ​ພ້ອມພຽງ. ​ໃນ​ພິທີ​ອັນ​ມີ​ຄວາມໝາຍສຳຄັນ​ນີ້ ທ່ານ​ຮອງ​ລັດຖະມົນຕີ ​ແລະ ທ່ານ​ຮອງ​ເຈົ້າ​ແຂວງ ກໍ່​ໄດ້​ຮ່ວມ​ກັນ​ຕັດ​ແຖບ​ຜ້າ​ເປີດ​ການ​ນຳ​ໃຊ້​ຂົວ​ຢ່າງ​ເປັນ​ທາງ​ການ ​ແລະ ກໍ່​ໄດ້​ລັ່ນຄ້ອງ 9 ບາດ ​ເພື່ອ​ເປັນ​ສິລິ​ມຸງຄຸນ​ໃຫ້​ແກ່​ການ​ເປີດ​ນຳ​ໃຊ້​ຂົວ​ໃນ​ຄັ້ງນີ້ດ້ວຍ.

Source:http://www.maf.gov.la/ເປີດການນຳໃຊ້ຂົວອູ່ຖາວອ/#more-1162

Posted in ຂ່າວ, ທົ່ວໄປ, ພັກ-ລັດ and tagged , , .