ດອກໄມ້ປະຈຳຊາດບັນດາປະເທດອາຊຽນ

ຈາກ ຄັ້ງຜ່ານມາ Admin ໃດ້ໃຫ້ຮູ້ກ່ຽວກັບທຸງປະຈຳຊາດຂອງ ແຕ່ລະປະເທດ ອາຊຽນແລ້ວ ມາມື້ນ Admin ໄດ້ນຳເອົາເລື່ອງດອກໄມ້ປະຈຳຊາດມາແນະນຳໃຫ້ຮູ້ຈັກ ສຳລັບຄົນລາວເຮົາແລ້ວຄົງຈະຮູ້ຈັກກັນດີນໍ ວ່າດອກໄມ້ປະຈຳຊາດລາວເຮົາແມ່ນດອກຫຍັງ ? ຄືດອກຈຳປານັ້ນເອງນໍ ເອົາລະ ເຮົາມາຮູ້ຈັກກັບດອກໄມ້ປະຈຳຊາດ ຂອງບັນດາປະເທດອາຊຽນອບບລະອຽດກັນເລີຍນໍ

ດອກໄມ້ປະຈຳຊາດບັນດາປະເທດອາຊຽນ ຮຽບຮຽງຂໍ້ມູນໂດຍ: ຊຽງກະເລັນ ບ້ານນາ

ດອກໄມ້ປະຈຳຊາດບຣູໄນ ກໍຄື ດອກຊິມປໍ (Simpor) ຫຼືທີ່ຮູ້ຈັກກັນໃນອີກຊື່ໜຶ່ງຄື ດອກສ້ານຊະວາ ດອກໄມ້ປະຈໍາທ້ອງຖິ່ນບຣູໄນ ທີ່ມີກີບຂະໜາດໃຫຍ່ສີເຫຼືອງ ຖ້າບ້ານເຕັມທີ່ແລ້ວກີບດອກຈະມີລັກສະນະຄັນຮົ່ມ ພົບເຫັນໄດ້ຕາມແຄມແມ່ນ້ຳທົ່ວໄປໃນບຣູໄນ ມີສັບພະຄຸນຊ່ວຍປິ່ນປົວບາດແຜ ຖ້າຫາກໃຜໄດ້ໄປປະເທດບຣູໄນ ຈະພົບເຫັນໄດ້ຈາກທະນະບັດໃບ 1 ໂດລາ ຂອງປະເທດບຣູໄນ ແລະໃນງານສິລະປະພື້ນເມືອງອີກດ້ວຍ.

  • ລາຊະອານາຈັກກຳປູເຈຍ (Kingdom of Cambodia) : ດອກລຳດວນ

ກຳປູເຈຍມີດອກໄມ້ປະຈຳຊາດເປັນ ດອກລຳດວນ (Rumdul) ດອກໄມ້ສີໄຂ່ປົນເຫຼືອງນວນ ກີບດອກໜາທຶບແລະແຂງເລັກນ້ອຍ ມີກິ່ນຫອມເຢັນ ຖືກຈັດເປັນໄມ້ມຸງຄຸນຊະນິດໜຶ່ງເພາະມີຄວາມໝາຍເຖິງຄວາມສົດຊື່ນຫອມຫວນ ແລະເປັນດອກໄມ້ສຳລັບສຸພາບສະຕີ ວິທີປູກທີ່ຖືກຕ້ອງ ຕ້ອງປູກໄວ້ໃນທິດຕາເວັນຕົກສຽງເໜືອຂອງເຮືອນ ທີ່ສຳຄັນຕ້ອງປູກໃນວັນພຸດອີກ.

ດອກໄມ້ປະຈຳຊາດອິນໂດເນເຊຍ ຄື ດອກກ້ວຍໄມ້ລາຕີ (Moon Orchid) ເຊິ່ງເປັນໜຶ່ງໃນດອກກ້ວຍໄມ້ທີ່ບານຢູ່ໄດ້ດົນນານທີ່ສຸດ ໂດຍຊໍ່ດອກນັ້ນສາມາດແຕກກິ່ງແລະຢູ່ໄດ້ດົນເຖິງ 2-6 ເດືອນ ໂດຍດອກຈະບານພຽງປີລະ 2-3 ເທື່ອເທົ່ານັ້ນ ທັງນີ້ດອກກ້ວຍໄມ້ລາຕີສາມາດຈະເລີນເຕີບໂຕໄດ້ດີໃນອາກາດຊື້ ຈຶ່ງພົບເຫັນໄດ້ງ່າຍໃນພື້ນທີ່ຕ່ຳຂອງປະເທດອິນໂດເນເຊຍ.

ດອກໄມ້ປະຈຳຊາດລາວເຮົາຄື ດອກຈຳປາລາວ (Dok Champa) ດອກຈຳປາລາວມີສີສັນຫຼາກຫຼາຍ ບໍ່ສະເພາະເຈາະຈົງວ່າຕ້ອງເປັນພຽງສີຂາວເທົ່ານັ້ນ ເຊັ່ນ ສີເຫຼືອງ, ສີບົວ, ສີແດງ ຫຼືສີໂທນອ່ອນຕ່າງໆ ມີກິ່ນຫອມຫວນຊວນດົມ ມີລຳຕົ້ນແລະໃບທີ່ສວຍງາມ, ໂດຍດອກຈຳປາລາວນັ້ນເປັນຕົວແທນຂອງຄວາມສຸກແລະຄວາມຈິງໃຈ ເປັນຕົ້ນດອກໄມ້ມຸງຄຸນ ຈຶ່ງນິຍົມໃຊ້ຢ່າງຫຼວງຫຼາຍເພື່ອປະດັບປະດາໃນງານພິທີຕ່າງໆ ລວມທັງເປັນພວງມາໄລເພື່ອຮັບແຂກອີກດ້ວຍ.

  • ປະເທດມາເລເຊຍ (Malaysia) : ດອກໃໝ່ ຫຼື Bunga Raya

ສຳລັບປະເທດມາເລເຊຍນັ້ນ ມີດອກໄມ້ປະຈຳຊາດເປັນໃໝ່ (Bunga Raya) ໃນພາສາທ້ອງຖິ່ນເອີ້ນວ່າ ດອກບຸຫງາ  ລັກສະນະກີບດອກເປັນສີແດງ ມີເກສອນຍື່ນກາຍດອກອອກມາ ເຊິ່ງຖືກຈັດໃຫ້ເປັນສັນຍະລັກຂອງປະເທດມາເລເຊຍ ເພື່ອເສີມສ້າງຄວາມເປັນປຶກແຜ່ນແລະຄວາມອົດທົນໃນຊາດ ໂດຍເຊື່ອວ່າຈະຊ່ວຍສົ່ງເສີມໃຫ້ສູງສົ່ງແລະສະຫງ່າງາມ ລວມທັງຍັງສາມາດເອົາໄປໃຊ້ໃນທາງການແພດແລະຄວາມງາມໄດ້ອີກດ້ວຍ.

  • ສາທາລະນະລັດຟີລິບປິນ (Republic of the Philippines) : ດອກພຸດແກ້ວ ຫຼື Sampaguita Jasmine

ດອກໄມ້ປະຈຳຊາດຟີລິບປິນ ຄື ດອກພຸດແກ້ວ (Sampaguita Jasmine)ດອກມີສີຂາຍ ກີບດອກເປັນຮູບດາວ ມີກິ່ນຫອມ ບານສົ່ງກິ່ນໃນຕອນກາງຄືນ ຖືເປັນສັນຍະລັກຂອງຄວາມບໍລິສຸດ ລຽບງ່າຍ ອ່ອນນ້ອມຖ່ອມຕົນ ລວມເຖິງຄວາມເຂັ້ມແຂງອີກດ້ວຍ ເຄີຍຖືກເອົາມາໃຊ້ສະເຫຼີມສະຫຼອງ ໃນຕຳນວນເລື່ອງເລົ່າລວມທັງບົດເພງຂອງຟີລິບປິນນຳອີກ.

ປະເທດສິງກະໂປ ມີ ດອກກ້ວຍໄມ້ແວນດ້າ (Vanda Miss Joaquim) ເປັນດອກໄມ້ປະຈຳຊາດໂດຍດອກກ້ວຍໄມ້ແວນດ້າຕັ້ງຊື່ຕາມຜູ້ປະສົມພັນ ຄື Miss Agnes Joaquim ຈັດເປັນດອກກ້ວຍໄມ້ທີ່ເປັນທີ່ຮູ້ຈັກຫຼາຍທີ່ສຸດໃນປະເທດສິງກະໂປ ມີສີມ່ວງສົດສວຍງາມແລະເບັ່ງບານຢູ່ຕະຫຼອດປີ ໂດຍຖືກຈັດໃຫ້ເປັນດອກໄມ້ປະຈຳຊາດສິງກະໂປມາຕັ້ງແຕ່ປີ 1981.

  • ລາຊະອານາຈັກໄທ (Kingdom of Thailand) : ດອກຄູນ ຫຼື Ratchaphruek

ດອກໄມ້ປະຈຳຊາດຂອງໄທ ກໍຄື ດອກຄູນ ຫຼືໃນພາສາໄທເອີ້ນດອກ ຣາຊພຣຶກ (Ratchaphruek) ທີ່ມີສີເຫຼືອກສວຍງາມ ເມື່ອເບັ່ງບານແລ້ວໃຫ້ຄວາມຮູ້ສຶກອົບອຸ່ນ ຖືເປັນສັນຍະລັກຂອງຄວາມມີກຽດສັກສີ ໂດຍມີຄວາມເຊື່ອວ່າສີເຫຼືອງອະລ່າມຂອງດອກຄູນຄືສີແຫ່ງພະພຸດທະສາດສະໜາແລະຄວາມຮຸ່ງເຮືອງ ລວມທັງຍັງເປັນສັນຍະລັກແຫ່ງຄວາມສາມັກຄີປອງດອງຂອງຄົນໃນຊາດອີກດ້ວຍ ໂດຍດອກຄູນຈະເບັ່ງບານໃນໄລຍະເດືອນກຸມພາ-ເມສາ ເຊິ່ງເປັນໄລຍະບຸນກຸດສົງການ ມີຈຸດເດັ່ນເວລາເບັ່ງບານຄືການຫຼົ່ນໃບອອກຈົນໝົດຕົ້ນ ເຫຼືອໄວ້ພຽງແຕ່ສີເຫຼືອງອະລ່າມຂອງດອກເທົ່ານັ້ນ.

  • ສາທາລະນະລັດສັງຄົມນິຍົມຫວຽດນາມ (The Socialist Republic of Vietnam) : ດອກບົວ ຫຼື Lotus

ປະເທດຫວຽດນາມ ມີດອກໄມ້ທີ່ຄົນລາວເຮົາຮູ້ຈັກດີ ນັ້ນຄື ດອກບົວ (Lotus) ເປັນດອກໄມ້ປະຈຳຊາດ ໂດຍດອກບົວເປັນທີ່ຮູ້ຈັກກັນໃນນາມ “ດອກໄມ້ແຫ່ງຮຸ່ງອະລຸນ” ເປັນສັນຍະລັກຂອງຄວາມບໍລິສຸດ ຄວາມຜູກພັນ ແລະການເບິ່ງໂລກໃນແງ່ດີ ດອກບົວຈຶ່ງມັກຖືກກ່າວເຖິງໃນບົດກອນແລະເພງພື້້ນເມືອງຂອງຊາວຫວຽດນາມຢູ່ເລື້ອຍໆ.

  • ສາທາລະນະລັດ ແຫ່ງສະຫະພາບມຽນມາ (Republic of the Union of Myanmar): ດອກດູ່ ຫຼືPaduak

ດອກໄມ້ປະຈຳຊາດຂອງມຽນມາ ຄື ດອກດູ່ ເປັນດອກໄມ້ທີ່ພົບຫຼາຍໃນປະເທດມຽນມາ ມີສີເຫຼືອງຄຳ ອອກດອກແລະສົ່ງກິ່ນຫອມໃນຕົ້ນລະດູຝົນ ປະມານເດືອນເມສາ ເຊິ່ງເປັນໄລຍະເວລາດຽວກັບປະເທດມຽນມາສະເຫຼີມສະຫຼອງປີໃໝ່ຂຶ້ນ ເຊິ່ງມຽນມາເຊື່ອວ່າດອກດູ່ຄືສັນຍະລັກຂອງຄວາມແຂງແຮງ ຄວາມທົນທານ ແລະເປັນດອກໄມ້ທີ່ຂາດບໍ່ໄດ້ໃນພິທີທາງສາດສະໜາຂອງຊາວພະມ້າ.

ຮູ້ຈັກກັນໄປແລ້ວສຳລັບດອກໄມ້ປະຈຳຊາດອາຊຽນທັງ 10 ປະເທດ ທີ່ຫຼາຍດອກກໍຄຸ້ນໜ້າຄຸ້ນຕາດີແລະເຄີຍເຫັນໃນປະເທດລາວຢູ່ ຫາກພົບພໍ້ເພື່ອນຮ່ວມປະຊາຄົມອາຊຽນທີ່ແວ່ມາຢ້ຽມຢາມເມືອງລາວແລ້ວ ກໍລອງມອບດອກໄມ້ເຫຼົ່ານີ້ໃຫ້ເພື່ອເປັນການຕ້ອນຮັບ ກໍຄົງຈະສ້າງຄວາມປະທັບໃຈໃຫ້ບໍ່ໜ້ອຍຄືກັນ.

ເອົາລະເຮົາກໍ່ໃດ້ມາຮູ້ຈັກກັນລະກ່ຽວກັບດອກໄມ້ປະຈຳຊາດຂອງ ບັນດາປະເທດອາຊຽນ ເຊິ່ງສຳລັບສ່ວນຕົວແອດມິນເອງກໍ່ຫາກໍ່ຮູ້ລະວ່າດອກໄມ້ປະຈຳຊາດຂອງ ແຕ່ລະປະເທດແມ່ນດອກຫຍັງ ເຊິ່ງຖືວ່າເປັນເລື່ອງທີ່ດີ ເພີ່ນໃດ້ຈັບເອົາຈຸດພິດເສດ ຂອງດອກໄມ້ແຕ່ລະປະເພດ ມາຕີຄວາມໝາຍ ຢ່າງລົງໂຕ ສຸດຍອດເລີຍ

Posted in ທົ່ວໄປ and tagged .